අහෝ වනපෙතත් ගිණිගෙන
*******************
*******************
වනවිල්වල ඇවිද ගොසින් ලගිනා තැන බලාපියෝ
අලි නොපෙනෙන කරඬු පෙනෙන පෙරහැරවල බලාපියෝ
කාසි සොයන සෆාරි වල අලි රෑනේ බලාපියෝ
යුරෝ ඩොලර් දළ විකුණන වෙළඳපොලේ බලාපියෝ
ඇණී කරඹ කටු පැසවූ කකුල නුඹේ රිදෙනවදෝ
වේදනාව ලඟට ඇවිත් හෙමිහිට මට කියනවදෝ
ගෝනි සැඳෑලය මත යන මිනිස් රූප බරවැඩිදෝ
පසාරු උන මූනිස්සමෙ වේදනාව දැනෙනවදෝ
වනන්තරේ ඇතින්නියා ගල් අරඹේ සිටින්නියා
නිරන්තරේ හඬන්නියා හඬමින දුක කියන්නියා
වනන්තරේ කපන්නියා යකඩ යකා දුවන්නියා
කතන්දරේ කියන්නියා යකාට දිවි පුදන්නියා
බලැති අයියනායක හිස කටින් ලී කොටන් ඇදගෙන
ඇඹුල් පොල්ලෙල්ල මුව තුල කියන් මට රසද දැනගෙන
දුවමු අප යලිත් කැලයට බැඳුණු ඔය යදම් බිඳගෙන
කඳුළු නොසලපන් නෙතු අග අහෝ වනපෙතත් ගිණිගෙන
